Նարեկ Ավագյան

Նարեկ Ավագյանը ծնվել է 1988 թվականին Երևանում: Ժնևի կոնսերվատորիայում (պրոֆեսոր Միշել Բելավանս) ուսումը ավարտելուց հետո Նարեկը ակտիվորեն մասնակցել է համերգային ելույթներին թե Հայաստանում, թե արտերկրում: Նրա նորարարական երաժշտական գաղափարները, մաքուր հնչողությունը և վիրտուոզությունը բարձր են գնահատվել անվանի երաժիշտների կողմից, ինչպիսիք են Սեր Ջեյմս Գալվեյը, Էրիկ Գոդիբերտը և այլք:

Այս պահին Նարեկը հանդիսանում է Հայաստանի ազգային ֆիլհարմոնիկ նվագախմբի գլխավոր ֆլեյտիստը և ելույթներ է ունենում նվագախմբի մենակատարի դերում՝ Ալեն Ալտինօղլուի, Անտոնի Վիթի, Լիոր Շամբադալի և Մանուել Էրնանդես դա Սիլվայի ղեկավարությամբ: Նա ելույթներ է ունեցել համաշխարհային համերգասրահներում, ինչպիսիք են Շվեյցարիայի Վիկտորիա համերգասրահը, Լոս Անջելեսի Վոլտ Դիսնեյ համերգասրահը, Դանիայի DR Կոնցերթհուզը, Պոլանդիայի Վարշավայի ազգային ֆիլհարմոնիան, Սանկտ Պետերբուրգի Մարիինյան թատրոնը, ինչպես նաև Ֆրանսիայում, Գերմանիայում, Նորվեգիայում, Ֆինլանդիայում, Հունաստանում և Մեքսիկայում:

Նարեկը նաև անցել է հատուկ բարոկկո երաժշտության դասընթացներ Ժնևի կոնսերվատորիայում պրոֆեսոր Սերգե Սայտայի ղեկավարությամբ և հաճախ նվագում է այդ ժամանակաշրջանի գործիքներով: Նա հանդիսանում է մի շարք ժամանակակից կոմպոզիտորների՝ ինչպես Հայաստանի, այնպես էլ արտասահմանյան, ստեղծագործությունների առաջին կատարողը, օրինակ՝ Էրիկ Գոդիբերտի և Յոհան Տրեյխելի։ 2018 թվականից նա հանդիսանում է ժամանակակից երաժշտության «Ասոնանս» նվագախմբի անդամ։